A Oficina de Información Turística (OIT) municipal acaba de presentar o balance do verán, que actúa como un indicador do auxe do turismo en Ares. Os datos proporcionados reflicten un rotundo éxito na tempada turística de Ares durante o verán de 2023, cun aumento significativo no número de visitantes e unha diversificación nos perfís de turistas que elixiron a nosa localidade como o seu destino vacacional.
Durante o últimos tres meses, a Oficina de Información Turística recibiu a 870 visitantes en xullo, 1,248 en agosto, 268 en setembro e 162 en outubro. En total, máis de 2,500 persoas acudiron ao punto de información en busca de detalles sobre o municipio e o seu atractivo turístico.
Cando contextualizamos estes datos cos mesmos meses de períodos anteriores, Ares experimentou un sólido incremento no número de visitantes á OIT: o verán de 2022 rexistrou 1,402 visitantes, o de 2021 tivo 658, e na tempada estival de 2023, pechou con 1,157 persoas máis que o ano anterior.
AUMENTO DE VISITANTES
Durante a tempada estival de 2023, Ares recibiu un total de 2,559 visitantes, o que representa un notorio aumento en comparación co ano anterior. En 2022, a cifra de visitantes foi de 1,402, o que significa un incremento de 1,157 visitantes en só un ano. Os meses de xullo e agosto destácanse como os máis concorridos, con 870 e 1,248 visitantes, respectivamente.
DIVERSIDADE DE PERFÍS DE VISITANTES
En Ares durante a tempada de 2023, predominaron dous perfís de visitantes. En primeiro lugar, parellas con fillos, ás veces acompañadas por familiares adultos, elixiron Ares pola súa tranquilidade e seguridade, tanto nas rúas como nas praias. A maioría destes visitantes son galegos, procedentes de cidades como Ferrol, Narón, A Coruña ou Lugo. O segundo grupo predominante compóñeno persoas de avanzada idade que optan por Ares debido á súa topografía sen desniveis e a dispoñibilidade de servizos ao longo da súa extensión. Neste caso, tamén se trata principalmente de turistas galegos.
PROCEDENCIA DOS VISITANTES
A pesar de que a maioría dos visitantes seguen sendo de orixe nacional, cun forte fluxo de turistas de Galicia, Madrid e o País Vasco, un dos aspectos máis notables en 2023 foi a chegada de visitantes europeos. Rexistráronse 43 consultas de turistas procedentes de países europeos, o que demostra o crecente atractivo de Ares a nivel internacional.
VALORACIÓN CONCELLEIRA DE TURISMO
Lucía Blanco, concelleira de Turismo, aproveitou a publicación do balance para ofrecer a súa análise: “Recibimos os datos de crecemento de maneira moi positiva. Tamén é importante destacar a alta demanda dos servizos turísticos que temos: as visitas ao Alboio de Quinín, os percorridos guiados no Mosteiro de Santa Catalina e as opcións de gozar de Ares desde a costa, cos roteiros de sendeirismo, e desde o mar, coas viaxes no barco M. Presas, ademais do servizo de alugueiro de bicicletas. Apostamos pola natureza e o patrimonio arquitectónico como dous dos nosos recursos máis importantes”, engadindo que “Ares consolídase como un destino de referencia en Galicia, atraendo tanto a visitantes nacionais como internacionais coa súa beleza natural, a súa seguridade e a súa hospitalidade”.
