O mercado municipal de Ares recibiu onte a visita dos alumnos do 1º ciclo de Primaria do CPI As Mirandas, que percorreron estas instalacións co obxectivo de coñecer como é o día a día nun mercado de abastos.
Os escolares puideron deambular polo recinto e descubrir a variedade de postos e produtos que se poden atopar nel, dende froita, verduras e peixe, ata queixos, doces ou frores. En definitiva, os artigos máis frecuentes que conforman a cesta da compra das familias.
Tras o percorrido por cada posto e as preguntas aos seus responsables, cada grupo deixou un debuxo que formará parte do mural “Quere o teu mercado”, con frases que plasman a súa visión da praza de abastos local e das vantaxes de mercar nela.
Ademais, ao concluir, a concelleira de Comercio, Lucía Blanco, entregou a cada un dos escolares un agasallo: unha mochila isotérmica, un libro, un bloc de notas e unha mazá.
Lucía Blanco indicou que “trátase de apoiar ao comercio local e dar visibilidade aos traballadores do mercado, á vez que concienciar desde idades temperás do consumo saudable e responsable, dando a coñecer os produtos de proximidade e achegando aos máis pequenos de forma divertida á realidade do mercado municipal”.
Esta iniciativa organizada polo Concello, en colaboración co CPI As Mirandas, encádrase dentro da campaña “Quere o teu mercado” que a Xunta promove xunto aos concellos, co obxectivo de apoiar, promocionar e visibilizar o papel dos mercados nas vilas.
Dentro das actividades programadas polo Concello con motivo desta campaña mañá, sábado 28, aproximadamente ás 11:30 horas, o mercado acollerá unha actuación da banda de gaitas de Ares para dinamizar o consumo durante a xornada.
