A obra pictórica, un acrílico de dimensións 140×100, está exposta na Casa da Xuventude municipal ata o 26 de xuño, data do sorteo.
As rifas poderán adquirirse no propio centro educativo, amais das vendas que realizará a mocidade aresá pola vila.
O Centro Público Integrado (CPI) As Mirandas vén de iniciar recentemente unha campaña de recadación de fondos para unha das saídas didácticas culturais do estudantado de 3º da ESO. Os mozos e mozas venderán rifas pola vila, e tamén no propio colexio, para sortear o cadro “Cabo Prioriño”, do profesor Victor Manuel Rodríguez Saavedra, que tamén organiza a saída didáctica do alumnado.
A obra pictórica, de feito, atópase exposta no último andar da Casa da Xuventude municipal, no marco da colaboración do Concello co CPI As Mirandas na recadación dos fondos. A veciñanza poderá achegarse a velo no horario de apertura habitual do edificio ata o 26 de xuño, data oficial do sorteo do cadro ás 12:00 horas no consistorio de Ares.
Rodríguez Saavedra, licenciado en Belas Artes (1990-1995) en Pontevedra, é docente de Debuxo e xefe de departamento dende 1999. Foi segundo premio de Pintura “Bello Piñeiro” de Mugardos e Mención de Honor no Certame Galego de Arte José Domínguez Guizán de Begonte, en Lugo, amais de realizar múltiples exposicións individuais na contorna de Ferrol e A Coruña.
Xusto no día de onte achegouse a concelleira de Educación, Noelia Montero Candal, ás instalacións da Casa da Xuventude para oficializar a recepción e exposición do cadro.
