Durante estes días, no Mosteiro de Santa Catalina atoparás unha exposición de 20 paneis nos que se recolle a localización, descrición e funcionalidades das baterías de costa da provincia da Coruña, unhas construcións estratéxicas e historicamente indispensables para a protección do territorio marítimo.

A día de hoxe, son miradoiros únicos dende os que contemplar a paisaxe do Golfo Ártabro.

A mostra, cedida temporalmente ao Concello pola Deputación da Coruña, poderá visitarse no cenobio ata o 31 de agosto, baixo horario de 18 a 20 horas, de luns a domingo, e tamén de 12 a 14 horas os domingos e festivos.

Con todo, a iniciativa tamén inclúe este xoves, 25 de agosto, ás 20:00 horas, unha conferencia sobre a importancia destes elementos defensivos impartida por José Manuel Yáñez Rodríguez, xefe de Servizo da Arquitectura da Deputación da Coruña e José Manuel López Hermida, estudoso da historia militar. Ambos son autores do libro “A defensa da costa. Provincia da Coruña”. A conferencia estará presentada polo alcalde da localidade, Julio Iglesias Redondo.