A ponencia, organizada polas Concellarías de Deportes e Benestar, realizarase ás 19:00 horas no salón de actos da Alianza Aresana, no marco da iniciativa Academia AresXSalud.
O psicólogo e educador físico Jose Antonio Barcía Tucceli debullará como existen pequenas decisións no día a día que poden mellorar a nosa calidade de vida, amais de comprender a fraxilidade e traballar para entrenar a nosa saúde fronte a ela.
A penúltima charla divulgativa da Academia AresXSalud que promove o Concello chega este venres, 12 de abril, ás 19:00 horas ao salón de actos da Alianza Aresana, baixo o nome “Adultos maiores: como activarnos?”. Desta volta, trátase dunha ponencia dirixida ás persoas adultas en xeral e que fará un percorrido polo estado da sociedade tras a covid-19, amais de afondar en como podemos superar a fraxilidade e os problemas dentro da rutina.
Durante unhas horas, reflexionarase sobre o contexto de vida contemporáneo e, tamén, sobre as decisións que podemos tomar para mellorar a nosa calidade de vida, apoderándonos e aplicando un cambio de enfoque na perspectiva que mantemos da cotiandade. O obxectivo último da ponencia: apoderar aos adultos maiores na súa toma de decisións.
O educador físico e psicólogo Jose Antonio Barcia Tucceli, especializado en psicoloxía do Deporte, conducirá a sesión enteira, que ten entrada libre até completar o aforo do salón de actos.
