93 negocios aresáns súmanse á iniciativa do Concello para fomentar a compra na hostalería e comercios locais.
Desenvolverase, coma anteriores edicións, do 1 de decembro de 2022 ao 31 de xaneiro de 2023 distribuíndo aproximadamente 280 vales-rascas e 5.000 euros en premios.
O alcalde de Ares, Julio Ignacio Iglesias, e a concelleira de Comercio, Lucía Blanco, veñen de presentar esta semana no consistorio da localidade unha nova edición do MercAres, a principal campaña de promoción do consumo local que organiza o Concello en datas de especial relevancia para a compra de proximidade.
“Vista a acollida tan positiva das dúas anteriores edicións tanto por parte dos negocios de Ares coma da veciñanza, tiñamos que continuar co esforzo de apoio ao comercio e hostalería da nosa vila. O MercAres é unha das mellores ferramentas para coidar o tecido comercial que nos é máis próximo”, salientou Lucía Blanco dende a súa área de Comercio.
A nova edición do MercAres producirase entre as datas do 1 de decembro de 2022 e o 31 de xaneiro de 2022 e basearase nuns vales que se rascarán, cada un con diferentes tipoloxías de premios que van dende os 5, 10 e 20 euros ós 100 e 500, a máxima contía que se poderá recibir. Segundo vén de desvelar a Concellaría de Comercio, repartiranse un total de 5.000 euros divididos nuns 280 vales.
Así, por cada compra superior a 10 euros nun dos establecementos adheridos á campaña de apoio o cliente recibirá un destes rascas e, se resulta premiado, deberá gastar a cantidade recibida en calquera dos 93 negocios de hostalería e pequeno comercio que se inscribiron no MercAres. O obxectivo final é dinamizar o tecido comercial cun círculo de consumo que fique na contorna municipal.
A celebración do MercAres, ademais, está moi relacionada coa posta en marcha dunha forma de consumo máis sustentable e solidaria, axudando a construír lazos máis fortes entre a institución local, a veciñanza e os negocios de Ares.
