O edil de Seguridade, José Juan Vilar, vén de entregar os 3 desfibriladores adquiridos polo Concello á Policía Local, despois da xornada de formación técnica que se impartiu en abril, organizada conxuntamente entre a área municipal de Seguridade e a Policía Local de Ares e na que se achegaron coñecementos tanto de reanimación cardiopulmonar (RCP) coma de manexo dos equipos.
Tras o investimento realizado polo Concello, que ascende a 4.000 euros con IVE, Ares disporá dun total de 5 desfibriladores semiautomáticos: 4 deles serán fixos e situaranse no consistorio, no campo municipal de Prados Vellos, no pavillón polideportivo e na caseta de socorrismo, e o último levarase no propio vehículo patrulla da Policía Local aresá.
