A formación, sen custo algún para a veciñanza, destínase a persoas maiores de 55 anos que desexen aprender a empregar aplicacións e facer axustes básicos no seu smartphone.
O obradoiro realizarase todos os mércores de maio, de 10:30 a 12:00 horas, no edificio de Servizos Sociais de Ares.
A Concellaría de Igualdade e Benestar vén de anunciar a posta en marcha dun curso formativo relacionado co emprego dos teléfonos móbiles intelixentes (smartphones) ao longo do mes de maio. O principal obxectivo é achegar un coñecemento cada vez máis necesario ás persoas maiores, combatendo así unha das problemáticas actuais como é a brecha dixital.
O curso oriéntase á veciñanza maior de 55 anos que teña interese por aprender cuestións relacionadas co smartphone dentro da vida cotiá. Dende axustes básicos e o emprego de aplicacións de comunicación ao escaneo de documentación ou a xestión de fotos e vídeos, haberá espazo para perder o medo ao emprego do teléfono móbil e entender mellor o seu funcionamento xeral.
Victoria Montenegro, concelleira de Benestar, salientou precisamente “a necesidade de achegar este coñecemento tendo en conta os cambios que trouxo a pandemia. Non podemos deixar a ninguén atrás e por iso desexamos facilitar o manexo do móbil no contexto dixital. Que as persoas maiores poidan aprender nun contexto amable a usar a banca electrónica, a aplicación do SERGAS ou mesmo falar cos seus fillos sen problemas”.
Estas clases serán totalmente gratuítas, distribuídas en 4 sesións de hora e media todos os mércores do mes. Organizaranse polo tanto o 4, 11, 18 e 25 de maio de 10:30 a 12:00 horas, con grupos de 10 persoas, no edificio de Servizos Sociais de Ares.
Para inscribirse, as persoas interesadas poden reservar praza ou ampliar información contactando vía telefónica co 981 448 354.
