A concelleira de Cultura, Alma Barrón, ven de dar a coñecer a programación do Ares Indiano 2023, a festa que afonda no vencello da localidade coa pegada migrante e que traballa na conservación da memoria local, xa consolidada coma referente sociocultural na comarca.
O evento contará con tres días de programación –do venres, 18, ao domingo, 20 de agosto–, apostando por novas actividades, como os obradoiros temáticos que se realizarán na semana previa ou a iniciativa musical de “Habaneiras na rúa”; e manterá a máxima de descentralización de actividades tanto polo núcleo urbano de Ares coma nas contornas de Cervás e Redes.
UN ARES INDIANO CUNHA PROGRAMACIÓN COMPLETA
A organización da festividade implicará manter actividades que xa funcionaban ben previamente, como son as rutas en bus ou as viaxes en barco, mais ampliándoas. “Este ano manteremos os roteiros teatralizados a pé, con Cayetano Lledó, que resultaron un éxito na pasada edición e tamén o espazo do paseo marítimo para aluguer de traxes de época, xa que este servizo tivo unha acollida extraordinaria”, informou Barrón, que comentou algunha novidade do próximo Ares Indiano: “haberá distintos obradoiros na semana previa á celebración, destinados tanto a público infantil como adultos, para que a xente poida ir participando no ambiente que se vivirá durante a fin de semana ”.
Dentro das programacións, contémplase un Seminario de Cultura Ultramarina, coa intervención de Pilar Cagiao, profesora titular de Historia de América da USC, que impartirá o relatorio “Galicia e Cuba, unha relación de raíz profunda”; ademais da presentación da novela “A madriña”, da escritora Nones Araújo, gañadora do I Concurso de Novela Curta Alén, impulsado polo Concello de Ares, co foco posto en poñer en valor o proceso migratorio que se produciu alén do mar. Nesta mesma liña, de recuperación da memoria da migración, levarase a cabo a presentación e posterior coloquio da novela “Azucre”, coa intervención da propia autora, Bibiana Candia.
Ademais da parte divulgativa, dentro do conxunto de actividades tamén haberá un espazo destacado para as actuacións musicais e exhibicións de baile, contando sempre coa colaboración de entidades e agrupacións musicais aresáns. Neste apartado destaca a actuación da banda de gran proxección no panorama musical galego “Gallaecia Big Band All Stars”, co concerto ao son de ritmos latinos que ofrecerá o sábado 19 na Praza da Igrexa. Tamén no tocante á vertente musical, este ano implantarase unha iniciativa novidosa baixo o nome de “Habaneiras na rúa”, o domingo 20 pola tarde, con tres grupos que amenizarán a festividade por varias localizacións da vila.
Con todo, o conxunto de actividades irá moito máis aló, por iso invitámoste a que botes unha ollada ao programa que te presentamos a continuación.
Non perdas detalle de todas as iniciativas das que poderás gozar no noso esperado Ares Indiano!
