Celebrarase este sábado, 11 de marzo, ás 16:00 horas e os afeccionados poderán achegarse a 15 clubs de A Coruña e Lugo que converten a regata nunha cita chave no calendario.
O alcalde de Ares, Julio Ignacio Iglesias; a concelleira de Deportes, Noelia Montero; Germán Sánchez e José Montero ‘Peli’, respectivamente presidente e secretario do Club de Remo da localidade, presentaron esta mesma mañá no consistorio a Bandeira de Bateis Concello de Ares, un evento deportivo que chegará o sábado, 11 de marzo (16:00 horas) á vila e que encherá a ría de embarcacións e ambiente remeiro no marco da Liga Norte de Bateis.
Noelia Montero, dende a área de Deportes, animou a que “os nenos e nenas, familias, veciños e veciñas en xeral acudan ó paseo marítimo durante a tarde do sábado, porque é unha xornada perfecta para gozar da regata de bateis con 15 clubs de A Coruña e Lugo que virán á nosa localidade”. “O único que agardamos”, concluíu Montero, “é que a climatoloxía acompañe e permita desfrutalo coma se merece”.
Dende o Club de Remo de Ares, o seu presidente Germán Sanchez salientou “a oportunidade que supón para que toda a afición se achegue ó paseo marítimo e anime á canteira, que está facendo un traballo extraordinario e aí están os resultados”. “Agora mesmo, temos máis nenos e nenas no noso Club que nunca, e merecen que a afición vaia a celebrar o seu esforzo”, declarou Sánchez.
Así, a regata servirá tamén coma unha festa para que os seareiros engalanen o municipio de Ares de azul, amosando unha forma singular de vivir o remo.
