Abriranse dous procesos de inscrición: un hoxe, 10 de agosto en adiante para os empadroados/as e outro, xa o 24 de agosto en adiante, para os non empadroados/as, ambos ata completar grupos.
A Concellaría de Deportes vén de informar sobre as actividades municipais que se porán a disposición da veciñanza xa dende o 1 de setembro, ampliando así o número de meses nos que estarán activas.
Despois do verán, Ares contará con varias sesións de pilates tanto no núcleo urbano da vila coma en Chanteiro; ioga na Casa da Xuventude; ximnasia en Caamouco e Cervás e tamén tonificación e zumba no pavillón polideportivo da localidade. O groso desta oferta destínase a maiores de 14 anos e supón unha boa forma de achegarse á práctica deportiva máis aló do calendario escolar, atendendo ás solicitudes feitas polos propios usuarios en anteriores anualidades.
Co adianto das actividades municipais, a inscrición arrancará xa a mediados deste mes en dúas quendas, ambas ata esgotar as prazas asignadas dentro de cada grupo. A primeira quenda arranca hoxe, mércores 10 de agosto, para os empadroados/as e a segunda, xa o 24 de agosto, para os non empadroados/as.
Este proceso de inscrición realizarase de maneira telemática na web municipal www.concellodeares.com, cubrindo o formulario que se atopará no apartado das Actividades Deportivas Municipais 2022-2023. Despois, a área de Deportes comunicará os seguintes pasos administrativos, a disponibilidade de praza e o comezo das actividades individualmente por correo electrónico ás persoas interesadas.
Do 1 ao 15 de setembro, ambos días de comezo e peche inclusive, farase o pagamento de matrícula e da mensualidade destas actividades que se veñen de facer públicas. Haberá tamén dous prezos de matrícula, un para empadroados/as de 9, 57 euros e outro para non empadroados de 17,93 euros.
TRES TIPOLOXÍAS DE DESCONTOS
Por último, de cara a axudar no acceso á oferta deportiva municipal, o Concello habilitará tres tipos de descontos nas cotas das actividades:
• Con 3 ou máis inscritos da mesma unidade familiar: 50 % de desconto na matrícula + 50 % de desconto na cota da actividade de menor importe.
• Familia numerosa: 50 % de desconto na matrícula + 50 % de desconto en todas as actividades.
• Familias carentes de recursos económicos (require solicitude previa, comprobación e informe emitido polos Servizos Sociais municipais): de balde.
Dende a Concellaría de Deportes expoñen que a partir de setembro completarase a oferta do municipio para os vindeiros meses coa difusión das tradicionais escolas deportivas municipais, que terán o seu comezo en paralelo ó curso escolar e rematarán o 31 de maio.
INFORMACIÓN ACTIVIDADES en pdf
triptico_actividades_deportivas_municipais-2022-2023
FORMULARIO DE INSCRICIÓN: https://forms.gle/qq2nSt5JSLcvc4Zc8
