As obras recuperaron o estado orixinal da propia cuberta do cenobio anterior á reforma de carácter militar e supuxo o arreglo dunha superficie de 162 metros cadrados.
A maiores do planificado no proxecto inicial, durante a actuación atopáronse elementos con valor patrimonial: letrinas orixinais, un forno ao carón da cambota e a canalización antiga dende os alxibes.
A Concellaría de Urbanismo dirixida por Olimpia Marcos vén de informar do remate das obras que se estaban a acometer na cociña do Mosteiro de Santa Catalina; unha intervención que arreglou o seu tellado, poñendo solución así ás filtracións de auga existentes e permitindo que a cuberta regrese ó seu estado orixinal.
Os traballos que veñen de rematar tamén supoñen unha clara mellora en termos de estabilidade e dignificación do patrimonio arquitectónico do mosteiro, deixando atrás as condición precarias nas que se mantiña a infraestrutura, que incluía partes oxidadas, goteiras ou desprendimentos importantes.
A maiores do arreglo na cuberta das cociñas, que mantén a tipoloxía a dous augas sobre os muros existentes, restaurouse a campá da chimenea da sala principal; levouse a cabo o saneamento da parte exterior do muro mediante un drenaxe que recolle as augas de escorrentía; reparáronse ventás, portas e faltas na fachada do inmoble e eliminouse o muro que dividía a sala principal en dous.
LETRINAS ORIXINAIS E UN FORNO, DESCUBERTOS DURANTE OS TRABALLOS
A rehabilitación que se desenvolveu durante estes meses non só implicou acometer unha mellora fundamental para o cenobio aresán, senón que tamén conlevou a aparición de varios elementos de interese histórico dentro do Mosteiro: especificamente, unhas letrinas orixinais e un forno ao carón da cambota. Ademais, co levantamento do pavimento de formigón, tamén se localizou a antiga canalización de auga procedente dos alxibes, na parte superior.
Con todo, a aparición destes elementos anteriormente nomeados significou un aumento do investimento da obra, inicialmente orzamentada en 131.000 euros asumidos entre o Concello e a Deputación da Coruña, mais que posteriormente incrementou nuns 35.000 euros con cargo ós fondos municipais.
Finalmente, tamén se recuperou parte do pavimento orixinal na zona da cambota e parte do comedor, que inclúe agora unha meseta elevada e unha rampla para a mellora da accesibilidade no espazo. No resto do chan, instalouse formigón pulido.
Olimpia Marcos, concelleira de Urbanismo, aproveitou o remate da obra para facer fincapé en que “esta intervención se suma ós esforzos e obras levadas a cabo polo Concello co mesmo obxectivo de rehabilitación, como é o caso do actual Cabido de Montefaro, a reparación dunha das fachadas do Mosteiro ou as constantes renovacións de ventás por medio dos obradoiros de emprego”.
Asímesmo, Olimpia Marcos contextualizou a intervención coma unha “continuación da liña de traballo que se está a executar na área, toda ela centrada no coidado do noso patrimonio histórico e cultural, en consonancia co Plan Especial de Protección de Montefaro e Punta Coitelada” do Concello de Ares.
