Dende o 1 até o 16 de agosto, o andar superior da Casa da Xuventude de Ares acollerá unha nova mostra pictórica no marco do seu ciclo de exposicións multidisciplinares, achegándose desta volta ás obras de María Gloria López Villares.
Instalarase a súa exposición ‘Bailarinas envueltas en poesía’, un conxunto de cadros que teñen tamén carga narrativa: cada composición amosa a unha bailarina en movemento, de marcadas liñas sinuosas e corpos en contorsión, acompañada dunha poesía que debulla unha historia. A atracción de Gloria López por elas nace directamente da beleza, dificultade e sacrificio que a pintora atopa na disciplina artística da danza.
A pintora aresá vai así máis aló das paisaxes e bodegóns que caracterizaron o seu percorrido pictórico, colocando a súa particular ollada no retrato e na pintura figurativa.
Calquera persoa interesada poderá visitala de luns a venres, de 10:00 a 14:00 horas, incorporando un horario de tarde os xoves e venres de 20:00 a 22:00 h.
A inauguración oficial formalizarase o propio 1 de agosto ás 19:00 h.
