A Alianza Aresana congrega no seu salón de actos a expertos especializados en campos como o xurídico, o social e o psicolóxico para abordar a complexidade da temática.
A xornada organizada polo Concello intégrase de 4 charlas e 1 mesa redonda en horario de mañá e de tarde.
Esta mesma mañá deu inicio a xa tradicional xornada divulgativa que leva organizando o Concello de Ares nos últimos 18 anos, unha iniciativa que congrega na Alianza Aresana a expertos e expertas en materia de igualdade para celebrar o 25N, Día Internacional da Eliminación da Violencia contra as Mulleres.
O evento arrancou coa apertura institucional, onde Victoria Montenegro, concelleira de Igualdade de Ares, formalizou a benvida e estendeu o seu agradecemento aos axentes involucrados, dende o CIM de Ares ata ás persoas ponentes. Montenegro estivo acompañada no seu acto de inicio da xornada por Sofía Fernández Fernández, educadora social, e José Luis Castro Feijóo, director do Centro de Información á Muller (CIM) de Ares.
Así, despois da inauguración institucional, a vila de Ares transfórmase en lugar de debate e reflexión, analizando as novidades na resposta xudicial ante a violencia de xénero, o papel das Oficinas de Atención a Vítimas dos Xulgados e a súa intervención psicolóxica ou mesmo o autocoidado do persoal profesional como forma de ser e estar no día a día.
Tamén haberá tempo para abordar a intervención xurídica dos CIM ante a violencia de xénero e as diversas formas de achegarse á violencia de xénero desde o ámbito forente, a seguridade cidadá e a orientación laboral, tendo en conta as esixencias que se demandan nos profesionais que traballan cunha materia tan sensible.
