Este acto musical, organizado pola Concellaría de Cultura, terá lugar o vindeiro domingo 25 de xuño na Igrexa San Xosé, a partir das 19:30 horas
A Igrexa San Xosé de Ares acollerá o próximo domingo, 25 de xuño, un concerto a cargo dos Coros Infantil e Xuvenil da Orquestra Sinfónica de Galicia. O evento musical, organizado pola Concellaría de Cultura do municipio, dará comezo ás 19:30 horas.
O Coro Infantil da Orquestra Sinfónica de Galicia é un centro de canto coral que cautiva ao público desde os seus inicios no ano 2000. Dirixido por José Luis Vázquez, este coro está formado por aproximadamente 50 nenos e nenas, con idades comprendidas entre os 10 e os Con 14 anos, colaborou en numerosas ocasións coa Orquestra Sinfónica de Galicia, interpretando obras mestras de compositores como Mahler, Orff, Shostakovich ou Fauré. Ademais, deixaron pegada en óperas como Werther ou Turandot, e traballaron xunto a destacados artistas como Emilio Aragón. Non só fixeron as delicias do público galego, senón que tamén cautivaron ao público de todo o territorio nacional, incluído o prestixioso Auditorio de León.
Por outra banda, o Coro Xuvenil da Orquestra Sinfónica de Galicia, presentado ao público en 2005, deixou a súa pegada como talentosa ponte coral entre o Coro Infantil e o Coro de Adultos. Dirixido por Daniel García Artés, este coro formado por 35 mozos e mozas de entre 13 e 21 anos participou en proxectos destacados xunto coa Sinfónica de Galicia. O seu repertorio vai desde clásicos como Carmina Burana de Orff ata composicións contemporáneas como a 2a Sinfonía de Mahler. Así mesmo, ofreceron concertos en solitario en diversas localidades galegas, sendo aclamados en festivais e eventos de gran envergadura, como as Festas de María Pita.
Neste concerto tan especial, tanto o Coro Infantil como o Coro Xuvenil amosarán o seu talento, xunto coa participación de Isabel Romero ao piano. Baixo a batuta dos seus directores, José Luis Vázquez e Daniel G. Artés, respectivamente, ofreceranos unha experiencia musical única.
Un repertorio excepcional
De Morris Albert a John Rutter, de Leonard Cohen a Alan Menken, estas voces interpretarán unha selección de pezas musicais que inclúen “Feelings”, “Hallelujah”, “Be thoug my Vision”, “Puttin on the Ritz”, “The Rhythm of Life”, “Aleluia”, “When you Wish”, “Que festín”, “Preparaos” e “A familia madrigal”, entre outras obras mestras.
