Ao longo deste mes de novembro, como parte das programacións polo 25N en Ares, estudantado da comunidade educativa do CPI As Mirandas recibiu uns contidos formativos básicos centrados nunha cuestión fundamental: como construír novas masculinidades e edificar coa colaboración de todos unha sociedade máis igualitaria.
Esta é a premisa dos Obradoiros Control Off, organizados polo Centro de Información á Muller (CIM) de Ares e o Gabinete de Orientación do CPI As Mirandas, no marco do Pacto de Estado contra a Violencia de Xénero.
O psicólogo graduado pola USC e Axente de Igualdade de Oportunidades para a Muller Rubén Villar Trenco conduciu as dúas sesións alternas que se produciron nas últimas semanas, afondando nos modelos positivos de convivencia e a corresponsabilidade familiar.
Estas accións desenvólvense como unha forma de dar continuidade ao proxecto de Control Off, que xa se materializou en anteriores anos, e que ten como obxectivo mellorar convivencia e promover valores baseados na igualdade de xénero en Ares.
