A concelleira de Urbanismo, Olimpia Marcos, anunciou esta semana o inicio do procedemento de contratación para a recuperación do camiño das Salgueiras. Segundo explicou, esta intervención embelecerá o litoral da enseada da praia de Chanteiro e permitirá a conexión entre o areal e o centro histórico das baterías da punta do Segaño.
O Concello obtivo unha subvención de 71.990,39 euros de Turismo da Xunta, a través dos Fondos Next Generation, para financiar este proxecto. Con esta axuda, levará a cabo o plan previsto, cun investimento total de 79.989,32 euros, cubrindo o Concello o importe restante.
En canto aos aspectos técnicos, o proxecto contempla dous tramos. O primeiro tramo, de 240 metros de lonxitude e 4,5 metros de ancho, requirirá un tratamento de rega reparador. O segundo tramo, unha senda peonil de 480 metros de lonxitude e 1,5 metros de ancho, construirase utilizando un pavimento de terra estabilizada e aproveitando a pedra da zona, creando unha base drenante natural. Ademais, ao longo desta senda instalaranse bancos e papeleiras cada 50 metros para disfrutar da vista ao mar.
A licitación para este proxecto xa está dispoñible na Plataforma de Contratación do Sector Público, e as ofertas poderanse presentar ata o 5 de xullo.
É importante destacar que esta intervención en Chanteiro súmase ás recentes obras de urbanización do camiño do Cruceiro e do camiño Real, que contaron cun investimento de 47.531 euros.
